jueves, 5 de junio de 2014

Primer concursu de piropos como cachopos "Purines ¿quies qu'andemos?"






1.- Puen participar les persones humanes que quieran, col númberu de piropos que -yos pete.
2.- Cada piropu tendrá que dir nuna semeya.
3.- Trátase de qu'escribáis un piropu (semeya, montaxe fotográficu, etc.) y lu colguéis nel mio muru. Hai que sacar una semeya onde se vea escrito.
4.- El xuráu va ser popular, cualquier persona que quiera podrá emitir el so votu que sedrá facer un click nel Me gusta.
5.-Los piropos puen ser los que me dediquéis o dalgún que vosotros hayáis dedicao o que vos dedicaren.
6.- Los piropos van colgase na páxina de Purines de Manzaneda y también, aquellos más guapos, nel blogue.
7. El día de San Xuan, a eso de les 12:00 el piropu que más me gusta tenga saldrá premiáu con ÚN de los siguientes exemplares que'l toscu del mio vecín me da y que nun gasto tiempo en lleer:
-Vivir ensin probalo
-Mil desiertos llugares
-Fame d'amor.
(Si queréis hasta fago qu'esi tordeyu vos lu firme)
8.-El llibru fadráse llegar a la persona agraciada per corréu a la dirección que conseñe.

jueves, 29 de mayo de 2014

Los caquéis


Purines, fía, onde los xubilaos del mio pueblu van poner un cursín de cup-cakes y nun sé si apuntame o non, ¿tu qué me recomiendes?
Beti D. (Entepenes)
     Oye, vamos ver, una cosa vos voi dicir: bastantina ye que vos tengo qu’aconseyar como pa enriba que me vengáis con eses palabrones. Soi conseyera, coime, que pa conseyeru, como diz Mino, cualquier pelamangos val, nun soi erudita…
     ¿Pienses que si supiere inglés diba tar equí? Tadría polo menos d’alcaldona en Madriz. Nun me deis más trabayu, cuquines y cuquiellos, que la que se tien que llucir soi yo, non vosotros.
      Entrugáisme estes coses, asina, y hasta tuvi que miralo per interné y yá te puedo decir una cosa: un inventu que nun tien nome (o al endefeutu, una equivalencia) en cristianu nun paga la pena. Eso, ta a les clares, nun ye otro qu’eses modernidaes que tanto s’estilen.
      Si cup-cakes significa pastelinos, ¿por qué diantre nun los llamáis asina?
      Voi dicítelo: porque si se llamen pastelinos yá nun resulta tan moderno, ¿a que non?
      A los caquéis esos nun-yos veo sentíu nengún; entá más, ye una aberración. Ye como una vegada na que dieron pela tele que decostruyeren una tortiella de patata, y envede metélu presu, cellebrábenlo como si descubriere América. Si, descubriere América nun vasu d’agua, nun te digo. Lo que pasó ye qu’al calquín del cocineru cayó-y la tortiella al dar la vuelta y como quedó estrapayao dixo, ¡hala, decostruyida!, y húbolos tan fatos que lo pagaron a preciu de mariscu.
      Pues sí, fía: lo de los caquéis ye otru tantu: ¿a qué fin vien armar una minicarrocina en piquiñino enriba d’una madalena? Amás, tuvi informándome con Mariví, la mio amiga, que ta más d’andar per cafeteríes y aporfióme que son una cocada y qu’ella una vegada pidió un par d’ellos y que los tien en casa d’adornu, nel mueblebar, ente los palombos de cerámica y los detalles de les bodes, porque-y da pena comelos.
        ―¡¡Colo que me costaron!! ¡¡Como pa comelos!!
Caquéis
       Pa informame, y poder dar cumplida respuesta a esta consulta, fici trabayu de campu, ye dicir, fui a un par de mercaíllos d’esos artesanales onde namás paecen vender y ganar el día los que vienden bollos preñaos y roquíes. Tamién, nel mio empeñu científicu, fui a casa Mariví a velos y nun di créitu: ¡¡¿Tan refalfiada ta la Humanidá que tien que s’entretener en tonteríes y bobaes tales?!! Home, colo que queda por investigar y descubrir y gastamos tiempu nestes fataes… Bolines de color metal, muñequitos de zucre, ¡¡como una falla valenciana pero en pequeñino!! ¡¡Y too se come!!
     Digo yo, si la naturaleza quixere que comiéremos el rosa princesa y l’azul cielu coquetu, tan mimosos dambos, ¿nun los tendría puestos nes fabes y los fréxoles?
     Bono, voi callar y nun dar más idees, que de xuru que dalgún llistu d’esos del I+D muta xenéticamente agora los alimentos ya inventa la cebolla en capes de colores, los maízos de colorinos o los chorizos de xabalí roxiblancos pa los del Sporting.
      Y otra cosa que te voi decir, y si comes tou esi zucre, qu’aporfíen nos programes de pela mañana na uno que cai tan bien pa la diabetes, ¿cómo vas facer cuando vayas pal retrete a les agües mayores? ¿Qué va ser eso, un derroche de lluz y de colores?
      Nun sé, nun sé. Mira, habiendo tantes coses por facer en casa y siendo tan rica y abondosa la nuestra gastronomía (casadielles, bartolos, fayuelos…), ¿nun te paez qu’eso de les caquéis ye un inventu sacaperres pa nada? Fáete un analís internu y vedrás que nun ye por comelo, sinon pa date importancia… ¿Qué sedrá lo siguiente?
       Yo, de ti, que nun lo soi, pero si lo fuere, apuntábame a encaxe de bolillos que tampoco ye que valga pa muncho pero polo menos nun te xubi’l zucre.  
 
 

domingo, 11 de mayo de 2014

El misteriu del Baco Escanciador

Demientres bien de tiempu vieno ruxéndose que qué pasaría con aquella figurina del Bacu que taba echando un culetucu eternu ellí, na fonte del Jardinillo. Unos dixeron que fueren los Rojos, que lu llevaren xunto col oru pa Rusia y qu'agora, dempués de munches trapaceríes, tienlu'l Putín del presidente nel so cuartu, que dicen que ye igual de grande que la sala'l Madison (que digo yo, coimes, que cómo s'arreglarán pa llimpiar eses alfombrones) y que lu tien ellí, escanciando vodka.
     Otros dicen que marcharon con él unos d'esos qu'andaben peles escombreres al fierro y qu'agora anden peles caleyes marchando colos somieres d'alambre que tienen de cierre o les bañeres que ponen pa beber el ganáu. Pero nun me paez a min, porque de xuru que taba vacíu per dientro y nun-yos ríndía la ganancia.
     Dalgún hubo que soltó -malintencionáu- que fuéremos les muyeres del pueblu les que, organizaes nuna comitiva llamada: Comitiva Ciudadana del Frente de la Sección Fememina pola decencia y Miramientu de les Lleis y Normes de Bona Urbanidá les que fuimos a la Casa Conceyu pa tar con Piro y dici-y que nun yera nin medio normal poner d'aquelles traces a un mocín como Baco, cola xorra al aire, pa que les mocines que comíen pipes los domingos y les que diben a dar el corte, en saliendo, miraren de rodrigüeyu y chismorriaren, que si ún que si l'otro. Bono, bien ye verdá que les que díbemos a misa nun lo víemos con bonos güeyos (y nun me refiero a que yá daquella cuásique toes gastáremos unes bones dioptríes) y qu'hasta comentáremos cómo los mozos lo usaben de chancia ente ellos y dicíense porconzoneríes como: ¡Calla chaval, qu'hasta'l Bacu la gasta más grande que tu! y otres bobaes d'esa triba que dicen los mozos.
     Y dicen que Piro, l'alcalde, aceutó daquella, non porque tuviere d'alcuerdu, sinón por quitanos d'en medio, y que mandó a los del ayuntamiento que marcharen col dichosu muñecu aquel que tanta guerra-y daba y punxo ellí una fontona de piedra que s'enllenaba de mofu, de verdón, de cagarrutes de gorrión y de bolses de plásticu. Y dalgunos piensen que sigue guardáu nun escuru suétanu del ayuntamiento o de les dependencies municipales, al pie del restu d'ayalgues del conceyu, al pie de los caretones y de los tomos históricos del conceyu.
     La historia ye muncho más simple y más cenciella y tien como protagonista a Choni la xastra. D'ella muncho entreguinos nun s'alcordarán porque tuvo a la renta nun pisu de La Vega onde sobrevivía remendando y tomando puntos a les medies, fgaciendo vainiques, perpuntando dobladinos, faciendo pirulís y otres llambionaes que vendía nun puestín a los domingos en parque y per La Llaguna (antiguamente fiestes de Nuestra Señora del Rosario) y yera especialista en facer les mazanes de carambelu con fruta que robaba de los praos, negociu qu'en más d'una vegada a puntu tuvo de costa-y un par de dentellaes nes ñalgues.
Paquín, el neñu bacu
      Choni, a la que yá nadie s'alcordaba de llamar Sunción, tenía un sobrín al que quería muncho y al que-y mandaba tolos años, pel so santu, un xersé que-y facía de llana. Tricotiaba la probe muyer con remiendo y cuidaba pañar retales o desfacer con munchu mimu prendes vieyes de les que pañar aquel xersé que-y llevaba, xunto cola caxa de llambionaes, al sobrín, pel santu.
     Un añu posóse del últimu tren de la Renfe col alma estrozada. Aquel sobrín que colos años ent
orniara y que se volviere un consentidín. Enfadáu porque nun-y regalaran la bicicleta que pidiere, azotó la caxa de les llambionaes y el xersé, y dixo que yá taba fartucu de que la tía que golía a mugos y a sutétanu siempre-y regalare aquellos xersés de llana tan feo que picaben y que tarrecía poner, y aquelles llambionaes de probes. La madre, que cuento yo que tenía que ponese firme, como yera moderna, dixo: "Ai, qué guaje, hai que dexalu qu'esprese'l so malestar como una parte importante de la so personalidá". Asina que la probe vieyina tornó surniando la llárima y prometiéndose nun volver más a la capital a tar a la casa del so hermanu, que nunca taba pa recibila, nin pa cola so cuñada, que se les daba de moderna, nin con aquel neñu al que malcriaron y que pidía a gritos un par de ñalgaes.
     Ñevaba. Enatamare a ñevar yá esperando'l cruce del otru tren en Tudela-Veguín y al posase del tren una cuarta cubría hasta'l todiellu a la probe Sunción; muncho llamentó nun haber llevao, por nun paecer de pueblu y facese la "fisna" aquelles madreñes casines que tán calentinos -y dexaben los pieses; temblaquiaba de fríu cuando aportó a l'altura del xardinín y ellí vio a aquel probe neñu, dulce, cola nieve cuayao cubriendo-y los costazos y los güeyos vivos que paecía que la comíen a peticiones.
     -¡Probín! ¡Qué fríu ha tar pasando!
     Y tentando aquel buruyu de llana enduviellao, arreglagó y metióse nel estanque pa pone-y al neñu, al Baquín escanciador, el xersé de llana. Pero como un ponía traza, trepó y trepó con él, hasta qu'acabó dando cama.
     "Ai madre, si me garren los municipales, menuda multa m'echen"
     Y entós, allá como pudo, foi tirando del xersé y llevándolu a rastres hasta'l cuartucu aquel qu'había onde'l túnel de La Vega, pa contra'l Bar Sierra. Garró fuelgu y xubiólu hasta casa. Tuvo malina dellos díes de la friolera que garrare y, dizque ellí taba'l so Paquín, col flequín revesosu y el rizu rizáu, apurándo-y un culete.
     D'entós, la muyer tresvoló un poco y tol mundo pnsó que d'aquelles fiebres se pasare porque recoyía pronto y dicía que diba pa casa con so Paquín (eso de Baco nun comulgaba pa con ella) y tol día de Dios andaba col dichosu guah.e al retortoriu.
     Sí cuquines y cuquiellos, esa ye la verdadera historia de la desapaición del neñín Baco. ¿Ónde ta agora? Eso ye yá otra historia que tendrá qu'aguardar un porfoliu nuevu...

viernes, 2 de mayo de 2014

Situaciones embaranzoses

Puri, quería yo facete una consulta. Resulta que tengo una "amiga" que ye, ¿cómo desplicalo finamente?, entradina en carnes, vamos tirando a gordina. El casu ye que como amás ta n'edá de merecer, tou dios-y entruga qué si ta preñada. Una de les veces contestó que non, que yera namás la gordura. Otra que non, que yera estéril. La mio pregunta ye la que vien darréu:
      ¿Tienen les que-yos sobren carnes derechu a poner camisetos prietos? ¿Ye normal que la xente se meta neses coses? ¿Qué contestación pue dar si-y vuelven entrugar lo mesmo?
      PD: Acompáñote nel sentimientu polo del mochu, toos y toes sabemos lo que ye perder un amigu.
Atentamente,
Amiga acuariu  (Vilnius)
 
Entiéndote, créeme, porque yo también atravesé per dalgunes d'eses situaciones embaranzoses; en munches vegaes tamién a min me miraron como a esa amiguina tuya y me dixeron lo de: "¿tas esperando?" , "¡Ai fía, tas pa posalo d'un momento a otru" o lo de "¿son ximielgos o trillizos?". Agora vese que la xente nun me diz lo mesmo pol tipín que me gasto y porque pensaríen que, col tiempu que tengo, yera más propio d'un milagru que d'un despiste míu y del mio Mino. Y nun ye que yo nun me lo mereza, quiero dicir, que nun ye por desmerecer, pero si daqué adeprendí d'esto ye qu'hai dos tipos de xente que te lo pregunta: la xente que ye meticono y aquello otro que, pa enriba de ser meticono, ye malo y entra ehí, a mancar, dañible.
     Ye normal que se metan porque, cuando'l diañu nun tien qué facer...
     Nun ye cuestión de sulfurase y entrar ehí, a dicir lo que yá saben (que ye gordura) nin qu'andar sacando pallabres que nun entienden (¿nun pensaríen que teril ye como'l dril, un tipu de xéneru?). Tampoco convién dicir escusines del tipu: ye que retengo llíquidos (pa que te digan, el pantanu de Tañes ye lo que retienes), o ye que voi mal al bañu (y que te llantén eso de: normal, nun entres pea puerte).
     Una vegada, cuando echaben aquella serie d'El Páxaru Espín, y andaba yo un poco necesitada d'operación bikinini (¿pa qué nos vamos engañar?) cuando me dixo Cuca que si taba esperando y solté-y yo, un poco mística y asomando la llarimina: "Sí, pero del Cura Párrocu". Y pasó que daquella díbemos col tercer cura que colgaba la sotana y escapaba con una beata, y fue dicí-ylo y llevase ella les manes a la boca y entrugame: "¿Tu también, fiya mía?". Y pidi-y que nun lo contare, confiada en que diba montar un bon espolín, contando esos llevantos y quedando dempués como la gocha delantre de toes. Y bono, ensin esperalo, consiguílo: porque resulta que la que taba col cura yera ella y escaparon los dos y dexáronnos ensin cura una temporadina, que nun pienses, ne., habíalos pa morrer y tuvieron qu'esperar.
     Lo que te dicía: si nun pues col enenmigu, axúntate a él. Yo cuando me lo dicíen, que si taba embaranzada, dicía-yos que sí, y cuando me daben la norabona, retrucaba: pero ye un embaranzu sicolóxicu. O dicía-yos que taba preñada d'intenciones, y dexábales con una cara magüetes que nun se llambíen.
     Y sí, claro que tienen derechu les que tan entradines de carnes a llevar la ropa preto: la gordura ye guapura. ¿Nun te pasa como a min, que ye ver a les que desfilen, colo escuchimizaes que tán tísiques del too? Home, a min dame una perceguera veles asomando tola güesera, ¿tan poco ganen que nun tienen nin pa un platu cocíu? Pues ello, ropa apretadino, y na playa, biquini. Mira, una vegada que fui colos del centru social a Madrid per Navidá a comprar no de Manolita una riestra cupones, garrónos la nube y cubixemos nel Muséu esi del Prau (que tantu cuentu y bien pequeñu ye'l prau) y ellí toles que taben retrataes yeren gorduques y salíen en porretu, ¡¡y mírales!! Ehí tán y cinco euros que nos cobraron por veles, que, como-y dixi a Mino: "Mira torollu, lo que lleves aforrao comigo, que me ves d'eses traces toles nueches que quies y dos veces cuando vienes enfiláu". Por eso te digo que, si mires bien, ye muncho menos lo que tien una invertío en ponese los michelines que lo que tienen otres en quitáselos (y yá me dirás qué procesu de los dos ye'l más feliz). Amás, ¿y los homes? ¿Nun los hai que paecen que tán criando un equipu fútbol nesos abdominales únicos? ¿Nun van ellos cola ropa preto y dalgunos -como Mino-van col fardagüevos y calquen el móvil a un llau y el peine al otru?
    Gracies polo del mochu, fía. Andamos a ver si-y encontratos un sustitutu afayadizu y en dientro poco yá-y toca echar la Misa del Carmen.

    (Pa la xente que quiera saber qué fue lo del mochu pue facese amiguino mio nel feis y podrá sábelo)

domingo, 20 de abril de 2014

Procesionar n'Asturies

¿Amiga? Purines: Esta mañana, como'l día nun ye llaborable y nun tuvi que dir a trabayar a Uviéu apliquéme en mio casa a entamar un poco cola llimpieza xeneral de primavera y punxi la radio pa dir escuchándola mientres fregaba la terrazuca que tengo. Nuna de les conexones que ficieron cola emisora d’equí (paezme que yera la de les noticies de la una) informaron de la bona ocupa...ción hotelera d’esta Selmana Santa n’Asturies, qu’al paecer va llegar casi al 100 por 100, cosa de la que m’alegro. Darréu, al ampliar la información esplicaron que los motivos principales pa esa bona ocupación yeren dos: la gastronomía y…, entecomillo aposta, “les procesiones”. Francamente, Purines, quedé paradina, paradina col tema. Y diome enforma que pensar. La verdá ye que yo nun soi relixosa y atiendo poco pa esa cuestión, anque sí sabía que facíen dalguna en Villaviciosa y en L.luarca y de xuru que n’Uviéu también. Pero… ¿ye pa tanto pa que sía un motivu fundamental pa traer turismu a Asturies? ¿Paezte que pue ser asina efeutivamente? Y si lo ye… ¿tamién nos va pasar ESO?
      Namás, Purines, aguardo la to rempuesta. Munches gracies.
      PD 1.- Nun voi dicir qué emisora yera, pero yá sabes tu de sobra que la cope nun yera nin tampoco radio nacional.
      PD2.- Vas permitime adelantame a la to entruga y respondete: Una LLIMPIEZA XENERAL ye la que se suel facer nes cases normales con cada cambiu d’estación (les 4 estaciones del añu, Purines, nun te llíes con otres estaciones). Yá sé que te chocará muncho, pero ye asina, Puris.
 
Pili F. (Mieres del Camín)
 
Cielín,
bien ye verdá qu'en dalgún llau d'Asturies hubo y hai procesiones, que pamidea son la esceición que confirmen la riegla de que nun ye una constante esi tema. Agora bien, en cuantes a lo que me plantegues, pámique que pue ser otru tantu colo que sucede n'Asturies colo de les sevillanes y les feries d'abril, que nun hai pueblu, parroquia o medianía que nun tenga una y hasta paez qu'equí se dio'l finito y los volantes con media vuelta de siempre y hasta en breve aseguraran qu'aquello de la picona, como lo del bable, ye un inventu d'unos pocos y qu'equí, de verdá de verdá, lo que de tola vida se dio fue'l cante jondo envede la tonada.
     Si esa emisora ye la que yo cuento que ye, con dicite que na so versión televisiva a un vecín míu una vegada que lu asantaron entrugáron-y que pa qué sirvía un castillete...
     N'Asturies hai una parte del periodismu que sigue la premisa de, que la realidá nun t'empuerque un bon titular, y en bien d'ocasiones los papeles y les ondes (con respetu a otros grandes periodistes qu'habelos hailos) faen d'esti Paraísu Natural un Paraísu de bonrollismu, salvamismu y actualidá fasión que nun se llamben...
     Con too y con ello, ye verdá que n'Asturies somos muncho de procesionar a llugares de cultu; yo soi mui devota de novena y espichéu y ye enterame de qué parroquia abre'l so portón pa tar ellí dende primer hora hasta les tantes; y ello también ye gastronomía.
     ¿Y acasu hai meyor procesión que la qu'entama la nuestra gastronomía percorriendo los tantos metros d'intestín gruesu y delgáu? ¿Nun hai xente a la que, como a los pasos de perehí pabaxo, atragántase-yos la procesión y anden comiendo kigüis (qu'hasta los hai que los comen ensin pelar la güevera)?
     Y ye que, digo yo que n'Asturies somos rebenganos y un poco protestones, como los ingleses, y muncho más mundanos, como la xente de bon xacíu y tiramos más pelo terrenal y hasta lo paganono (qué ye eso de pintase los güevos, como faen en Siero o en Sama de Llangréu, nun periodu de recoyimientu -bono igual los güevos, colos rebusquinos del pincel, queden engurriaos...)
     En verdá hai otres munches maneres de procesionar n'Asturies. Xubí yo col mio Mino esti sábado a facer la Ruta L'Alba y taba aquello como la Feria de Muestres el día de la Caxa, cuando regalaben gorres y non les tonteríes que faen agora -que tamién yera una manera de procesionar. Llugares de pelegrinación tamién y de procesión, amás de los chigres y les espiches, puen ser Rodiles, Villamanín, Perlora, Valencia de Don Juan, Boñar, Delesma y yá, pa los más avanzaos, Los Narejos de Murcia, Roquetas y, antañu, siendo mui fiel y de carné, Rodiezmo (onde tamién daben gorres). Pero siempre buscamos un, nun sé, un aprovechamientu: cargues colos palos de los fréxoles o de les fabes, cola macona patates, col cuchu en cestu, pero eso d'allombar de baldre un tabláu... Nun sé, como que nun lo veo...
 
     Esperando que les mios pallabres t'agradaren y afayaras nelles reconfortu, 

En Siero y en Llangréu, píntense los güevos.
(Semeya tomada del blogue monterapicona)
 
Besines de Purines.
 
 
     PD. En cuantes a la llimpieza xeneral ta bien que lo recalques porque eso ye como los trenes, cuquina, lo normal ye facela cuando cambiamos d'estación, pero tamién hai que facelo de tresbordu, y cuásique ye recomendable cambiu d'apeaderu... Eso ye lo que se debe facer cuando una casa ye honrada y llimpia. Sicasí, hailes fía, que son como l'AVE, que paren lo xusto y too lo faen a tou meter; o como'l tren esi que vien de Madrid y en Lleón da vueltes y vueltes, y anda perdiendo'l tiempu como si tarreciere ponese al llabor.
 
 
 

martes, 8 de abril de 2014

Vieyos espacios, nuevos usos

Prestóme cómo t´esplicasti na consulta, Purines de Manzaneda, y cómo dices que pases per Mieres namás que pa dir ensugar a Valencia D. Juan aprovecho pa pidite opinión sobre esti asuntu: Kaos y Las Pérgolas, dos discoteques un mesmu destín(Alimerka). ¿Qué ta pasando?¿Ye dalgún raru enclín?
 
Xuanón el Trabáu (Altu Ayer)
 
Estimáu Xuanón:
 
Ta a les clares que, como dices, hai una tendencia a usar los vieyos locales con nuevos usos. En concreto, como bien anotes, les antigües sales de fiestes tán camudando en supermercados. Yo creo que se debe a dos cambios que coinciden: per un llau, el cambiu nel ociu de la xente mozo y per otru, la desapaición del pequeñu comerciu.
¡Anda que nun había enantes tiendes d'ultramarinos nos pueblos, si había hasta chigres tienda! Vamos, que, si te fixes, xúntase la fame coles ganes de comer. Ello nun ye dalgo moderno, porque si te fixes, ¿qué usu se-y dieron a los cines d'hai tiempo? En concreto, el Cine Vital, de L'Entregu camudó nunes cocheres; el Cine Virginia, de Sotrondio, ídem; el Gran Teatru Maxi, ídem d'idem...
Khaos, reutilizáu...
Y tenemos suerte que llegó l'Alimerka enantes que los chinos, porque mira que si na antigua Terraza de Khaos creen un supermercaón HIPER Asiáticu enllenu d'esos gatinos que tán tol día apolmonando cola mano, da-y que te pego...
Con too y con ello, qué quies que te diga, eso de qu'en Khaos haya un Alimerka, yo nun lo veo; inténtolo, sí, pero nun lo veo. A les puertes dame que va tar Mastache encorbatáu pidiendo carnés y ellí reconozo, onde los carros, el roperu; onde ta la panadería veo los antiguos reservaos onde amorecía la mocedá apalpándose; onde los baños, ¡¡ta la pescadería!! y nel escenario, poniendo tola carne nel asador, la carnicería...
De xuru que si Iker Jiménez pasa una nueche ellí-y salen tolos discos enllenos de sicofoníes enllenes d'allaríos de los munchos sescudiones y amores muertos mataos ellí, cuando la calentura nun dexaba tiempo nin vagar pa dir contra'l campu fúbol d'El Parque...
 
PD: Nun lo diba dicir, pero como ningún mandatariu llee esto, voi ponelo: el día que descubran que nos Hospitales y nes Escueles pueden agospiar tiendes d'El Corte Inglés o Grandes Mercaos Asia, el gobiernu va atopar la manera de salir de la crisis (de la d'ellos, claro, qu'a la xente llano van siguir cobrándonos el kilowatiu a preciu de caviar).
 
PD2: Tamién se m'ocurre otra idea... ¿Qué había ellí enantes? Na discoteca de Felechosa, una vegada que me llevó Mino, alcuérdome que había que pasar per un horru y que taba como nuna cuadra (aparte de que les muyeres nun pagábemos entrada, como tien que ser). Esa taba fácil, pero, ¿y estos llugares?
 

lunes, 7 de abril de 2014

Sobre los cuadros de Xurdín (George Bush, Jr)


Estimada (ye un dicir) Purines de Manzaneda: Llevo yá bastantes díes enferma por culpa los virus primaverales, pero púnxime muncho muncho muncho peor esta mañana namás que vi en periódicu los cuadros que pintó George Bush Jr. (Jr significa Junior, o sea, fíu, pa que t'aclares) y, ente ellos, unu d'Aznar coles napies igual igual qu'un pimientu morrón. Y digo yo ¿hai derechu a que, pa encima de tener que pagar ¡2 eurazos! pol periódicu, nos atormenten con enxendros talos que nos suben tovía más la fiebre? A ver qué me dices, Purines. Nun me falles.
PD.= ¿Tas segura que nun anduvisti per Mieres aireando la guedeya? Porque yo viruses como estos nunca los padecí.
Pilar F. (Mieres)

Hola cuquina:
      Ye verdá que s’armó bastante revuelu col asuntu de Xurdín y los sos cuadros, pero yo, por muncho que miro, nun veo nello razón pa tantu discutiniu. Vamos ver, ye verdá que’l rapaz nun ye mui afechiscu pa la pintura y que los chiquillos de la escuela na que llimpio faen coses más guapes. Agora bien, yá sabíemos qu’a Xurdín –y faltaba una patatina pal quilo y que, por muncho que’l pá puxe por ello, nun va ser candidatu a Nobel.
     Nostante, ensin entrar a valorar artísticamente los dibuxos –que nun quiero tirame’l pegote de criticuca- ¿y si’l rapaz fuere un portentu y nos tuviere enseñando cola so faceta creativa cómo son los líderes mundiales en verdá? Maxínate que ta faciendo como aquella película del señor Wilde y lo que muestra nun ye’l paecíu físicu, sinón l’estáu espiritual de los nuestros líderes mundiales. Asina, vemos a Putin con esa cara bisarma, l’estáu descompuestu de podredume d’Aznarín, ¿nun tará denunciando que Toñín Blair va colos de la feria y vien colos del mercáu, porque nun se lu conoz nin en casa? Y qué dicir del pá, con esa pinta de carca…
     Yo véolo asina. Amás, qu’otra cosa te quiero dicir: yá me prestaría a min tener un expresidente que nun arreniega de poner el delantal (que mui cuco ye, por cierto, ¿en qué puestu del mercaíllo lu atoparía? ¿Sedrá de los chinos?) y seguro qu’echa una mano en casa, y non como n’España, que se nos meten toos a directivos de les eléctriques y asina tenemos la factura de la lluz, que col recibu que me vieno esti mes nun sé si yera’l míu o’l de la NASA. ¿Qué puen gastar los EEXX en pintures, porque en pone-y clas yá vemos que poco?
 
     Ai, la pena que nun descubriere esta afición primero, enantes d’embarcanos en tantes engarradielles que tan mal nos sentaron.

      Faes bien n’esclarame lo de Jr. Porque talmente pensé que yera igual de malu que JR el de Dallas, que tamién yera como los pantalones, texanos, y que perehí p’allá –yos poníen esi mote a los malos.
      Y en cuantes a lo de mercar el periódicu, cáete bien, por dáteles de progre. Hai que facer como tola vida: dir a una cafetería y por esi preciu, cásique desayunes y llees el periódicu y, si madrugues, arramples hasta colos númberos del sortéu del Alimerka y, si vas pela tarde, dante la fueya de la quiniela colos númberos de la primitiva y un par de chistes.

PD. Por Mieres va tiempu que nun voi, que dende que sois del camín namás paso perellí camín de Valencia de Don Juan. Esos viruses sedrán de la edá, muyer, que de dalgo hai que morrer.